انصار:( د تله ۸مه)، د ایران د بشري حقونو سازمان وايي، په دې هېواد کې د دوو افغانانو په ګډون ۱۴ تنه اعدام شوي دي.
یاد سازمان په یوه خبرپاڼه کې ویلي، دغه ۱۴ کسان د سنبلې له ۲۶مې تر تېرې چهارشنبې پورې د شېراز د عادل اباد په مرکزي زندان کې اعدام شوي دي.
بل لورته په ناروې کې د ایران د بشري حقونو سازمان چې یو غیردولتي بنسټ دی، وايي چې له دې سره په تېرو دوو اوونیو کې په دغه زندان کې د اعدام شویو بندیانو شمېر ۱۹ ته ورسېد.
د ایران د بشري حقونو سازمان ویلي، د شېراز په مرکزي زندان کې د ډله ییزو اعدامونو د اجرا بهیر څاري او له نړیوالې ټولنې غواړي چې د مرګ د سزا د دا ډول استفادې په وړاندې غلې پاتې نه شي.
یاد سازمان تېره پنجشنبه ازادي راډیو ته ویلي وو، د روان میلادي کال په نهو میاشتو کې لږ تر لږه ۳۳ افغانان په ایران کې اعدام شوي چې دا د تېرو څو کلونو پرتله څو برابره زیاتوالی ښيي.
دغه بنسټ ویلي، دوه کاله مخکې په ایران کې ۱۶ افغانان، خو تېر کال ۲۵ افغان وګړي اعدام شوي وو.
د ایران د بشري حقونو سازمان دوه ورځې وړاندې هم ویلي وو چې په دې هېواد کې د تېرو دوو کلونو پر تله د افغانانو اعدامونه زیات شوي دي.
د ایران د بشري حقونو سازمان، په ایران کې اعدام شوي کسان د ټولنې زیانګالی قشر ګڼي او په دې باور دی چې ممکن په ځینو مواردو کې بېګناه کسان هم اعدام شوي وي.
URL تعقيب: https://www.ansarpress.com/pashto/33670
